മുഖകവചങ്ങൾ നമുക്കു സമ്മാനിച്ചത് പലതാണ് . ഇത്തിരി തത്വം പറഞ്ഞു തുടങ്ങിയാൽ ഈ നാനാവിധ ജീവജാലങ്ങളുള്ള അണ്ഡകടാഹത്തിൽ (കടം : ബഷീറിക്ക ക്ഷമി : വാക് ദാരിദ്ര്യo) എല്ലാവരും ഉണ്ടെന്നു വെറുതേ തോന്നുമെങ്കിലും ഓരോരുത്തരും ഒറ്റക്കൊറ്റക്കാണെന്ന ഓർമ്മപ്പെടുത്തൽ ...
പിന്നെ നമ്മുടെ നാട്ടിലുള്ള കണ്ണുകളുടെ സൗന്ദര്യം, വൈവിധ്യം, അനന്തത , നീലിമ ..ഇവയെ കുറിച്ചുള്ള അവബോധം ..
ഈ കണ്ണുകളുടെ ആഴത്തിലേക്കു നോക്കി മനസ്സ് വായിക്കാനുള്ള ഉദാത്തമായ അവസരമാണ് തുറന്നു കിട്ടിയത് .. മനോഹരമാണ് ആ ഭാഷ ..കളളമില്ല ..ദ്വയാർത്ഥങ്ങൾ ഇല്ല...എഴുതാപ്പുറങ്ങൾ ഇല്ല .... പക്ഷെ വല്ലാത്ത നിഗൂഡതയുണ്ട് ..ചുണ്ടുകളുടെ ഭാഷ മാത്രം വശമുള്ളവർ ഇനി ഈ നയന ഭാഷ പരിജ്ഞാനം നേടേണ്ടിയിരിക്കുന്നു ..വേഗം ..
പിന്നെ കൊഴിഞ്ഞു വീണത് ചിലരുടെയൊക്കെ അഹങ്കാരമാണ് ..ഇത്തിരി പൊങ്ങി നിൽക്കുന്ന പല്ലുകൾ ഒളിച്ചു വെക്കാൻ കഷ്ട്ടപെട്ടു മാമുക്കോയ ചിരി ചിരിച്ചവരെ കല്ലെറിഞ്ഞ കുറെയേറെ പേർ ഇവിടെയുണ്ട് ..വടിവൊത്ത വെളുത്ത പല്ലു കാട്ടി സുഹാസിനിച്ചിരി ചിരിച്ച കുറച്ചു പേർ ... ആ മുല്ലപ്പൂ പല്ലുകൾ കാട്ടിയുള്ള ചിരി ഇനി വീട്ടിലെ കണ്ണാടിക്കു മാത്രം സ്വന്തം...... അവരിൽ ഒരാൾ ആവാതിരുന്നതിന്റെ ചാരിതാർത്യം പിന്നെയും ബാക്കി 😊
സൗന്ദര്യത്തിന്റെ നിർവ്വചനം തന്നെ മാറിയില്ലേ .."മൂക്കില്ലേ ...മൂക്കുണ്ട് ..പക്ഷെ നിന്നെ പോലെ ഓഞ്ഞ മൂക്കല്ല ..."... ഇനി എന്ത് മൂക്കുണ്ടായിട്ടെന്താണ്... നാലാളെ കാണിക്കാൻ പറ്റ്റ്വോ ... മൂക്കുത്തി കാണാതെ തപ്പി നടന്നവരൊക്കെ തിരച്ചിൽ മതിയാക്കി ...ലിപ്സ്റ്റിക്ക് കച്ചവടക്കാരും മൂക്കുത്തി കച്ചവടക്കാരും പുതിയ മേച്ചിൽ പുറങ്ങൾ തേടി യാത്രയായി..
ഇനി പുരികവും കണ്ണും മുടിയുമാണ് ആകെയുള്ള പ്രതീക്ഷ..
സൗന്ദര്യം ഇല്ല എന്ന അപകർഷതാ ബോധം പേറി നടന്നവർക്കു ഇതൊരു സുവർണാവസരമാണ് .. മുഖത്തിന്റെ മുക്കാൽ ഭാഗവും മൂടി കഴിഞ്ഞാൽ പിന്നെ ശ്രീനിവാസനും മമ്മുക്കയും തമ്മിൽ വലിയ വ്യത്യാസം ഒന്നുമില്ല....
അങ്ങനെ നോക്കിയാൽ ഈ മുഖ കവചങ്ങൾ വ്യക്തിത്വ വികസനത്തിന് ഒരു പാട് സംഭാവനകൾ നല്കുന്നുണ്ട്... ഇതൊക്കെ നമ്മൾ കാണാതെ പോകരുത് ...
No comments:
Post a Comment
Note: only a member of this blog may post a comment.